全國政協常委陳永棋兩年前走去做友好協進會主席嘅時候，已經有政界人士預言，友好協進會未來肯定唔簡單。果然，有京官訪港，閉門向親中人士發表報告，有資格出席嘅只有三類人士，除咗港區人大、政協之外，就係友好協進會嘅成員。咁講法，即係友好協進會變相升咗格，同屬於建制系統嘅人大、政協平起平坐。
友好協進會係民間團體，自從兩年前由全國政協常委陳永棋擔旗做主席，就開始「變質」，被形容為港區政協隱形辦公室，都不為過，以前政協常委裏面嘅一班大孖沙，好似新鴻基地產嘅郭炳湘同新世界發展嘅鄭家純咁，過去鮮去加入社團，不過依家就紛紛填表做晒會員，陣容即刻唔同晒，同以前李東海揸莊嘅年代不可同日而語。咁多大孖沙畀面友好協進會，梗係事出有因啦。聽聞一百五十幾名港區政協，早前全部收到中央駐港機構嘅一封信，呼籲大力支持友好協進會嘅工作，呢個協進會是否變相成為港區全國政協喺香港嘅平台，大家心中有數！