世界家庭醫生學會亞太區會議尋日在灣仔會展盛大開幕，雖然今次係閉門會議好低調，但卓妮打探到會場內醫學界名人聚首一堂，嘉賓有國家衞生部副部長劉謙、中華醫學會會長鍾南山、醫管局主席胡定旭（肥胡）等，當然少不了做東道主嘅亞太區主席李國棟醫生啦！李國棟會後仲邀請鍾南山等講者到銅鑼灣名人「飯堂」洗塵。
肥胡揀地方款待賓客
卓妮打聽到，李國棟諗住咁難得各地嘉賓一場來到，梗係要請大家品嘗吓香港美食，於是一向識飲識食嘅肥胡，就建議去「飯堂」食番啲好嘢。「飯堂」總經理譚綺玲（玲姐）親自寫菜單，菜式包括蒜豉杭州椒粉斑球、煎焗大連鮑魚、生拆雞絲竹笙翅等，當然少不得「飯堂」嘅招牌點心檸檬叉燒酥及銀絲翡翠餃，總之菜式少鹽少油，啱晒追求健康嘅醫生們。
自掏荷包宴客嘅李國棟就謙稱：「今次只係象徵式擺兩圍普通嘢，求其食餐飯啫！」話雖如此，淨係見佢同肥胡咁細心揀選食飯地方，就知佢哋幾重視班醫生嘉賓啦！
鍾南山話美抗疫鬆懈
傳染病專家鍾南山貴為大忙人，尋日來港參加開幕禮後，今早會主講一場題為「中國基層醫療改革」嘅講座，然後就會離開，所以尋日難得見到鍾南山，卓妮就梗係要問吓佢點睇人類豬流感疫情啦！鍾南山話，中港兩地防疫工作做得唔錯，相對爆發以千計個案嘅美國就較為鬆懈，佢話目前對策只有盡力做好自己嘅本分，將感染機會降低，減低病毒變種機會。
原定計劃出席開幕禮嘅愛滋病專家何大一，尋日因為有要事未能出席，要到周日（七日）下午才參與壓軸演講，主講全球熱門話題「病毒感染」。不過，無論何大一講得幾精彩絕倫，個講座都係私人派對，要四月底前報名參加才有得入場，不同身份有不同收費，非註冊會員要八百美元，即約港幣六千二百四十元，而醫科生最平二十五元美元，約二百港元。
卓妮