公屋聚賭問題長揭長有，沙田瀝源邨居民李先生直指邨內聚賭問題持續逾十年，非但經年未有解決，情況更日趨嚴重，「幾乎每日都有成幾十人、有男有女咁聚喺熟食中心對出嗰度賭錢，牌九、十三張乜都有，成個賭場咁，（房署）職員行過見到都扮睇唔到！」
公屋聯會主席王坤狠批房屋署未有嚴厲執法，等同縱容違法行為，「房署其實好多嘢可以做，好似引用扣分制，又可以報警，但佢哋成日都放軟手腳，根本就係縱容！」
儘管證據確鑿，房署發言人仍拒絕面對現實，指事件為「懷疑有人聚賭」，並稱屋邨辦事處已加強巡邏，監察是否存在聚賭活動，一旦發現將作干預及通知警方採取行動。
