呢嗱，嗰棵咪就係刺桐囉，樹幹同埋枝椏都有好多刺㗎。仲有喎，有一種昆蟲叫做刺桐姬小蜂，最鍾意入侵刺桐嘅，所以大家一見到棵樹病病地，千祈唔好行咁近。
呢嗱嗱，嗰棵係鳳凰木，夏天開紅花，好鬼壯觀㗎，遠望直情好似着火咁，所以英文名叫做Flame of the Forest，「森林大火」咁解。之不過咁，鳳凰木好惹蟻嘅，尤其係白蟻，所以大家一見到棵樹有白蟻蛀過嘅迹象，即刻彈開三丈遠穩陣啲。
呢嗱嗱嗱，嗰棵就係木麻黃嘞，英文叫做Horsetail Tree，可想而知，條狀樹葉似馬尾。見到木麻黃有乜嘢要注意呀？都係嗰句啦，彈開三丈遠穩陣啲。
知道咁多樹木特質，功夫茶係咪好叻仔？真係要多謝政務司司長唐英年㗎，如果唔係佢呢個管樹大隊長失職，搞到全港樹木冧完一棵又一棵，功夫茶真係冇興趣去翻查咁多資料呀。
尋日之嘛，有一位周先生揸車途經旺角嘉道理道，失驚無神冧咗一棵木麻黃落嚟壓住架車。聽見轟一聲，鄰近嘅神召第一小學暨幼稚園有學生衝口而出：「係唔係有人跳樓呀？」嘩，你都咪話唔恐怖，成棵樹十五公尺咁高，兩噸重泰山壓頂砸落嚟，周先生福大命大逃出鬼門關咋，不過佢架名貴積架就傷咯，唔知有冇得醫。
至於前日咯喎，何文田巴富街一棵鳳凰木半夜三更忽然折斷跪低，砸到一架的士扁咗，當時正在車廂瞓覺嘅司機，大吉利是講句，幾乎一睡不起。
如果計埋淨係冧樹而好彩冇導致途人傷亡嘅個案，真係多到數唔晒。或者可以咁講，如果你去每一個冧樹現場觀摩觀摩，逐棵樹研究研究，功夫茶包你好快就可以成為學富五車嘅樹木活字典。
巴富街冧樹，康文署嘅解釋好搞笑。佢哋話喎，去年十一月已經收到嗰棵鳳凰木有傾斜現象嘅投訴，當時判斷冇倒塌危險。去到上星期一，即係五月十八日，職員根據外部觀察，冇發現白蟻，不過由於樹幹表皮有被車輛撞過嘅痕迹，傾斜度已經構成威脅，所以計劃移除。結果大家都知嘞，未移除，已冧樹。
點解話佢哋搞笑呢？原來康文署真係唔識驗樹㗎，竟然唔知道冧樹嘅元兇其實係白蟻，只不過陰差陽錯以為有車撞過就有威脅，咁先至話要移除咋。
嘉道理道冧樹嘅解釋仲滑稽，康文署估計係因為大風吹。唉，白癡成咁，功夫茶忠告市民，唐唐呢個管樹大隊長絕對信唔過，行街街想保住命仔咩？首先，離樹三丈；其次，戴定鋼盔；然後，準備呼救。大家可能會話，有冇咁誇張呀？係就係誇咗少少，不過，全港有七十六萬棵樹咁多，而樹王只得一個，而且係半途出家乜都唔識嘅，趨吉避凶都係小心啲好。