本文重點
豬流感肆虐，大家記住洗手、洗手、洗手！身為醫院管理局主席嘅胡定旭，更加身體力行，示範點樣做一個注重衞生嘅好市民。
肥胡上星期出席一個籌款晚宴時，食飯前從西裝褸嘅袋中拎出一支自備嘅洗手液，仲慷慨借出嚟畀附近幾枱食飯嘅賓客消毒，佢話呢支洗手液大有來頭，事關佢係得到世界衞生組織認可，不過市民想買都買唔到喇！
三蚊支市面買唔到
洗手液周街都有，不過肥胡極力推介嘅呢支，除咗得到世衞認可，仲因為佢嘅質地係水狀，絕對唔會黐立立，一句講晒就係爽啦！最緊要仲係價錢都只不過係三蚊一支，真係人人都負擔得起！
既然呢支洗手液咁好，當然好應該供諸畀各位市民啦，但係肥胡擰擰頭話，正因為呢支嘢咁好，所以已經畀醫管局掃清光啦！
雖然支洗手液喺市面上買唔到，但為咗確保大家都記得要注重個人衞生，肥胡絕不孤寒，同其他賓客一齊分享，仲親自為晚宴上嘅賓客搽上洗手液，果然係好好服務。