財爺鬍鬚曾尋日大鑼大鼓再次「派糖」，營造一片所謂利民紓困氣氛，咁啱得咁蹺，工業總會亦發表《珠三角港資企業調查報告》，話有一半受訪嘅珠三角港商透露自五月以來，定單有逐漸回升趨勢，相信大規模倒閉潮及裁員潮已過，復甦在望。財爺同工總齊齊唱雙簧，一時間人人以為香港經濟真係好掂。
呢個調查，查實得一百四十六份回應，不過工總就好重視呢份「唱好」調查報告，主席陳鎮仁及副主席劉展灝花足兩粒鐘開記招。陳主席更加多兩錢肉緊，話喺唔同場合口頭訪問過逾百位港商，得出嘅結果同今次份報告好脗合喎。但話口未完，劉副主席承認港商近期接到嘅定單只係「碎單」，數量不及以前多，亦有壓價情況，但廠商抱住「開齋」心態， 寧願賺少啲都希望有工開。
陳主席又補充話，過去一年珠三角有逾萬間港資公司結業，唔少員工要執包袱走人，意味世界依然好難撈。其實，影響經濟復甦嘅變數依然多，太早唱好香港經濟，恐怕只會令市民空歡喜一場。