政府舊年年底重組整筆撥款督導委員會，去監察非政府機構對撥款制度嘅運作，十七名委員全部來自非政府機構管理層、服務使用者同其他工會等，由社會福利署署長余志穩做主席。呢個重組後嘅委員會尋日開第一次會議，點知會都未開就甩轆，第一件事就係換人。
呢個原先獲委任嘅委員叫做梁兆燾，點解佢連第一次會都未開就被撤換呢？原來呢位只有廿三歲的年輕小伙子，已考到政務官職位（AO），家陣正接受緊培訓，一心踏入政府服務大眾。
翻查梁兆燾嘅背景，原來佢喺中五會考時獲得九優佳績，其後獲中大取錄就讀保險、財務及精算學系，畢業之後加入ＩＢＭ任商業顧問，舊年更係香港區其中一名火炬手，更曾獲社署選為傑出義工，因此獲政府委任入整筆撥款督導委員會幫手。
政府未見官即打八十大板，惟有即刻拿拿聲再委任另一個人補位，接任嘅又係一個有為青年叫謝炳堅，曾經攞過傑出少年獎，廿二歲大學畢業後已經創業，成為廣告製作公司合夥人，叻人入到政府，唔好畀佢嘅官僚作風搞到意興闌珊就好嘞。