本文重點
端午節明日就到，好多議員都舉辦包糉和派糉活動，近年就有私人機構贊助包糉材料，由議員自行蒸熟再送畀獨居長者應節。不過，議員包糉嘅衞生情況向來無乜人知，好似民主黨立法會議員李華明，尋日就被居民投訴縱容義工喺佢油塘邨議員辦事處門外公眾地方包糉，將包糉材料擺放在坑渠邊極不衞生，結果被屋邨保安員強行清場。
「蒸熟就衞生！」
現場所見，有十多個義工幫肥仔明包糉，個個無戴口罩，甚至連手套都無戴就徒手拿起糯米放喺荷葉上，而一大盆糯米同材料就放喺坑渠邊，旁邊仲放咗多把掃把，又好難怪被居民投訴嘅。肥仔明解釋話，年年都被人投訴包糉唔衞生和阻街，其實包糉位置並非太阻居民出入，至於講到啲糉唔衞生，攞去酒樓蒸熟咗就自然衞生啦。
真係難為佢講得出。肥仔明貴為食物安全及環境衞生事務委員會主席，衞生標準應該較一般人高，絕不能因為食物透過高溫殺菌，就可以罔顧包糉過程衞生，萬一長者食咗出事，好事就變壞事，贊助機構就真係多得你唔少囉。
卓妮