本文重點
香港人成日畀人話唔識寶，往往將珍貴歷史檔案當成垃圾。有一百三十幾年歷史嘅東華三院創先河，前日宣布拉埋港大合作為機構編寫口述歷史檔案，東華副主席、賭王三太陳婉珍都畀面撐場。
同三太傾開佢啲仔女，佢話三名仔女已相繼入讀大學，大女超雲喺英國嘅Kingston大學修讀經濟，二女超蓮亦四出物色合心水嘅英國大學，細仔猷啟想獨立，話要同家姐分道揚鑣去美國讀書，但超蓮同猷啟都話要同大家姐一樣選修經濟。燊哥家族生意大到一對眼都睇唔晒，多幾個數口精叻嘅仔女幫手睇住盤數，生意算盤就打得更噹噹響喇。
黃紹倫笑對民調風波
卓妮轉頭見到港大校長徐立之，佢自爆咁耐以嚟首次到訪東華喺上環嘅總部，見到內裏古色古香嘅建築物，不禁嘆為觀止。同場仲有港大前副校長黃紹倫，講起幾年前因牽涉入民調風波導致下台嘅往事，佢輕描淡寫話係好好嘅影響，笑言搞學術研究至係佢嘅強項。黃紹倫依家以港大亞洲研究中心主任身份參與東華口述歷史計劃，遠離是非圈，似乎更啱佢。
講番個口述歷史計劃，認真係大製作，計劃為期三年，將蒐集近一百個同東華相關人士嘅口述歷史故事，包括東華前任主席、已退休或屆退休之年嘅資深東華員工、東華畢業生等。咪睇小一人一句講古仔嘅感染力，加加埋埋隨時變成港人一本集體回憶錄。
卓妮