警察叔叔盡心盡力為市民服務，功夫茶因乜事幹質疑佢哋呢？哦，冇嘅，事關翻查紀錄，原來嚇你一跳，近年高空墮物嘅舉報個案每年過千宗，平均一日三宗，你都咪話唔得人驚。更加恐怖嘅係，警方破案率低得可憐，只有兩至三成。如果有人係擲物狂徒，一定心諗：嘻嘻，你捉我唔到嘅，我掟！我掟！我掟掟掟！
高空墮物嚴格嚟講分兩種。一種係冇意嘅，可能係大風吹；一種係故意嘅，可能係玩變態。之不過，無論係冇意定係故意，後果都一樣，途人生命安全受到嚴重威脅。試過㗎啦，九九年有石屎掟到一位女小販死咗，○六年有鉸剪直插一位老婆婆頭頂，雖然大難不死，但係都嚇餐懵。換轉係你吖，頭殼頂直不甩插住一把鉸剪送院，幾尷尬呀！
高空墮物破案率點解咁低呢？主要原因當然係缺乏俗稱天眼嘅閉路電視監察啦，所以油尖旺區議會嘭嘭聲要求政府喺西洋菜街案發現場加裝天眼。其次咯喎，講句老實說話，警方有時真係愛理不理㗎。
呢嗱，有一單畸屎係咁嘅。有一家姓麥嘅市民，本月三日麥先生外出釣魚，麥太太同八歲大嘅乖仔喺梨木樹邨屋企樓下乘涼，突然抬頭一望，咦？點解屋企着火㗎？麥太一個箭步衝上去，喺保安員協助之下撲熄大火，不過好多家具已經燒到爛晒。跟住警方到場調查，拋低一句「起火原因冇可疑」，拍拍屁股走咗。
嘩，查都唔查就鬆人，有冇兒戲咗少少呀？根據麥太所講，九成係樓上缺德鄰居亂掟煙頭，燒着晾衫衣物，跟手波及室內。呢個推測都好合理啫，警方竟然置之不理，難怪麥太好激氣咁話：「咁同縱容人犯法有咩分別？」
另外仲有一單畸屎又係離譜嘅。有一位陳小姐路經屯門友愛邨，突然聽到後面傳出轟然巨響，轉頭一望啦，嚇鬼死，原來有鐵錘從天而降，擊爆石屎地面。可想而知，如果陳小姐行慢兩步，爆嘅唔係地面，可能係佢嘅骨頭。陳小姐即刻向巡警反映啦，點不知，警方後來不了了之，全無跟進行動。
好嘞，點解警方懶得積極追查高空墮物呢？可能有人傷亡就緊張啲囉，冇人傷亡咯喎，咁就求求其其算鬼數㗎喇。不過，功夫茶想問一問警方，有條盲毛揸車衝紅燈，係咪只要冇造成交通意外就可以放過佢？飛車黨以時速二百公里橫衝直撞，係咪只要冇導致人命傷亡就可以隻眼開隻眼閉？講真，擲物狂徒嘅危險性有時仲大過飛車狂徒，有人連雪櫃都夠膽死掟落街，如果咁啱掟得中，後果同撞車差唔多㗎咋！
點都好啦，唔該警察叔叔生生性性，積極少少提高破案率，一來保障市民生命安全，二來咯喎，保障警方形象吖嘛！