今年係學友社成立六十周年，又係第一年實施新高中學制，一向做開學生活動嘅學友社，搵咗同佢哋同名嘅張學友嚟做學友社大使，協助推廣學友社嘅活動，包括一系列有關「三三四」新學制嘅宣傳活動。學友尋日出席咗學友社舉行嘅委任儀式，正式出任學友社大使，佢仲同大家分享自己當年讀高中嘅日子，自爆當年佢同好多人一樣，本身都係唔多鍾意讀書，所以當年讀完高中之後，曾經掙扎過究竟係繼續讀書、定係選擇出嚟做嘢好，最後佢選擇咗出嚟做嘢。
依家嘅新高中學制多咗咁多科選擇，唔知學友點睇呢？佢就話，如果佢當年讀書嗰陣係新高中學制，咁就唔使咁煩惱喎。當然，依家嘅新學制，都仲未有唱歌呢一科可以讀，學友會點揀大家都唔會知。不過好彩佢最後都出咗嚟唱歌，否則樂壇就少咗個天王巨星。
學友社每年都會設立會考熱線畀應屆會考生打去求助，難得搵到張學友做大使，唔知會唔會搵佢去開解吓啲會考生呢？學友社就話仲同學友傾緊未來嘅工作安排，好希望學友可以抽時間親自聽聽應屆會考生嘅求助電話；若然成事，到時肯定造成電話網絡大塞車！