天文台前台長「黑英」林超英經常言論出位，最經典係對「凌晨」同「清晨」嘅字面解釋咬文嚼字，諗住為颱風訊息混亂搵藉口，點知愈描愈黑。黑英嘅接班人李本瀅，唔知係咪從前任身上領悟到講多錯多嘅道理，上任之後喺「台長網誌」撰文，愈嚟愈「慎言」，字數一篇少過一篇，最新作品四百字交貨，惜墨如金。
黑英鍾意發表言論，回顧佢做天文台台長期間，喺「台長網誌」嘅撰文就略知一二，洋洋灑灑千幾字係等閒之事，好似佢臨別前嘅幾篇文章，包括「超強颱風，溫黛再世」同「夜宿大帽山」咁，都成千五字。人哋話：言簡意賅，黑英嘅文章係咪達到意賅境界，各人觀點不同，但就應該講唔上言簡嘞。
李本瀅自五月十一日正式履行台長職位，不過佢早喺一個月前已經開始喺「台長網誌」撰文，第一篇「接棒」，即係搶閘自己宣布做台長嗰篇；第二篇「歷史為甚麼重要？」字數比黑英嘅文章少，都有一千字；第三篇「天氣災害」，字數又少啲，八百字，到最新喺五月十五日寫嘅講全球溫度上升危機嘅文章，連文帶表，五百字唔夠，李台長似乎愈嚟愈惜墨如金，同黑英風格迥異，唔知係太忙、定覺得黑英講多錯多嘅經驗前車可鑑呢？