本文重點
金融海嘯衝擊百業，靠廣告維生嘅八卦雜誌首當其衝受影響，銷量應聲下跌，為求賣紙，不惜絞盡腦汁加鹽加醋炮製八卦新聞。據聞一本向來嘩眾取寵、專門搞搞震嘅雜誌，近日就度出一條「屎橋」，打算向城中名人埋手，派狗仔隊追蹤名人，企圖搵番啲噱頭催谷銷量。
誠哥批評《明報》斷章取義
呢間傳媒機構一向惡行昭彰，臭史多到好似成本電話簿咁厚，不時以狗仔隊追訪名人，搞到神憎鬼厭，堪稱「無所不用其極」！今次出擊興波作浪，睇怕連城中首富李嘉誠亦走唔甩，隨時成為受害者，肯定有排煩。
其實誠哥作為城中首富，不時成為針對目標，除咗呢本雜誌外，報紙都唔放過佢，搞到誠哥忍唔住不平則鳴。好似就延長董事禁售期風波，誠哥最近就二度開腔批評自稱「公信力第一」嘅《明報》，斷章取義，無中生有，刻意「設局」畀佢，令佢喺董事禁售期風波中備受質疑。
依家呢本雜誌想再向城中名人「開刀」，不過城中有頭有面嘅名人何其多，睇怕某傳媒搞唔到一個，就會轉移目標搞第二個。政商界嘅大中小名人，都係打醒十二分精神，小心為妙！