尋日西九文化藝術區管理局董事局開會討論本地文化藝術軟件問題，身為董事局成員之一嘅香港小交響樂團音樂總監葉詠詩，踢爆咗香港人冇對藝術嘅起碼修養，根本唔識得尊重藝術家。
葉詠詩喺會議上分享咗一件事，原來獲得過二十一項格林美音樂獎提名、攞過兩項獎項嘅小提琴大師Pinchas Zukerman，同埋佢位大提琴家太太上星期嚟香港舉行演奏會，之後佢哋訂好商務客位機票，準備登機離開香港，點知因為佢哋無向航空公司港龍申報，約一點二米高、四十五厘米闊嘅成人用大提琴上唔到飛機，最終要勞煩到高層先至搞掂件事。
一肚氣嘅葉詠詩話，呢件事已經反映出香港人唔尊重藝術家，對藝術工作亦唔了解，佢仲話作為前線嘅地勤人員，其實可以婉轉啲向當事人解釋，都好過一口拒絕唔畀人上機呀！
葉詠詩仲話香港小交響樂團以往坐港龍或者國泰飛機，都遇過類似因為樂器過大而發生嘅問題，坐法航同英航去法國、英國就完全冇呢啲問題。正如葉詠詩喺會上話，試問咁嘅情況一而再發生，西九文化區仲可以點搞呢？