本文重點
道歉最緊要誠意，「3L」林健鋒（Jeffrey）就係教材。早前Jeffrey搞Gag玩大咗，同傳媒講搵咗前商務及經濟發展局局長馬時亨做3L嘅總幹事同前勞工及福利局局長葉澍堃做主席，激到肥亨紮紮跳咁嚴正澄清絕無其事，仲省咗佢一鑊，Jeffrey於是諗計氹番老友肥亨，上星期二，佢連喺四季酒店中菜龍景軒嘅政界Party都甩底唔去，請肥亨去跑馬地著名法國餐廳Amigo食飯賠罪。不過，同枱又拖埋立法會「五散人」嘅陳健波同「卿姐」劉慧卿，似政界飯局多於和頭酒，Jeffrey「搭單」賠罪，呢餐請得認真抵！
上星期二，一班政界朋友喺龍景軒開餐，出席者有專業聯盟石禮謙、貿發局主席蘇澤光、機管局行政總裁許漢忠同葉澍堃十幾人，畀錢請客嘅係深圳東海花園老闆黃楚標，而個場據知就由葉澍堃推介，認真識食。
黃楚標宴客 Jeffrey照甩底
龍景軒係香港唯一獲米芝蓮評為三星餐廳嘅食肆，以貴價海鮮製作點心聞名，招牌貨有「龍太子蒸餃」同「鮑魚酥」，嗰晚黃楚標埋單，每位人頭要千幾蚊。不過，呢份咁誘人嘅三星級美味，依然吸引唔到Jeffrey，佢應承但最終甩底，原來貢咗去跑馬地Amigo。
Amigo招牌菜係「龍蝦湯」、「白酒汁鱸魚」同「燒牛柳」，深受城中名人歡迎。Jeffrey雞髀打人牙骹軟，相信肥亨嘅怒火喺觥籌交錯間已經煙消雲散啦。不過，呢餐嚴格嚟講只算係一場政治飯局，事關席間仲有卿姐同陳健波，佢哋四個一早約好。聽陳健波講，肥亨初段猶有餘怒，嘲諷Jeffrey如果出到一千萬元，佢就做3L總幹事嘞，點知Jeffrey駁嘴：「一千萬就無嘞，畀份遺囑你啦。」肥亨頂番轉頭：「咁我就唔做嘞，不如我介紹王永平畀你吖！」咁嘅場面，算唔算擺和頭酒，都係一個疑問。不過大家都喺政界打滾多年，咁嘅事對佢哋嚟講，睇怕只係過眼雲煙，濕碎到極！
卓妮