本文重點
特首早前單方面宣稱將率領全體立法會議員再次訪問四川，但議員就堅持訪川團應由立法會主席帶隊，雙方鬧得好唔愉快。為免順得哥情失嫂意，據聞四川當局已經決定無論邊個帶隊，都暫時謝絕立法會到訪。為平息議員不滿，政務司司長將於今晚邀請部分議員，同專程來港嘅四川省官員同枱食飯，變相取代議員親身訪川。點知餐飯又撞正立法會討論新大樓工程嘅會議，令多名議員分身乏術、愈搞愈㷫。
立法會早前宣布由主席帶隊組團訪問珠三角，特首就偏偏揀喺同一日公布稍後會帶團訪川，擺明係要搶立法會風頭，辣㷫部分議員，上周末內會就通過以立法會名義自行申請訪川，又要求港府就之前批出嘅頭兩期四川重建撥款，提交詳盡進度報告，否則唔排除否決傳聞中嘅第三期撥款。
婉拒到訪 特首累街坊
其實四川全省上下正忙於災後重建，邊得閒分心招待你班議員四圍貢，加上當地政府亦唔想喺七一前夕呢個敏感時刻，捲入特首同立法會呢場意氣之爭，因此決定暫時婉拒議員以任何形式到訪，只會派專責籌統重建工作嘅常務副省長魏宏來港，向港府匯報頭兩期重建工程嘅進度，特首呢鋪真係累街坊！
邀請食飯 望支持撥款
特首失言闖禍，但就要下屬幫佢執手尾補鑊，將化解今次訪川爭議同爭取立法會通過第三期撥款嘅責任，一腳踢咗畀政務司司長接手處理。司長尋日就向立法會多個委員會嘅正副主席發出請柬，邀請佢哋今晚六點半到官邸同魏宏食飯，希望可以利用副省長做人肉擋箭牌，令班議員放棄訪川計劃之餘，繼續支持撥款。
不過多名獲邀嘅議員，都不滿今次飯局安排得太倉卒，好似當佢哋隨傳隨到；加上最關注重建工程嘅立法會發展事務委員會，晨早訂咗今日下午兩點半至六點半開會，最後一個議程仲係關乎全體議員利益嘅新立法會大樓工程，好似逼班議員喺四川重建同新大樓工程之間二擇其一。有個別議員就表明寧願留喺立法會開會，都唔去司長官邸食飯，政府今次真係拆彈變捉蟲。