功夫茶就有一位朋友，幾年前買咗一部新電腦之後，對住舊電腦不知幾咁憂愁，送畀人又冇人要，揼落垃圾桶又良心難安，覺得不負責任，卒之打電話問功課，打去環保署睇吓有乜好建議啦。哈，整鬼佢吖，原來環保署仲廢過電子廢料㗎，居然冇人答得出舊電腦應該送去邊度棄置，吹到啤一聲。
唔知係咪因為有太多人問過類似問題，問到擘大個口得個窿，環保署舊年終於諗出一條環保計仔，就係推出「流動車回收計劃」嘞。即係咁，假如你有唔用嘅電腦或者電器，你可以送去呢部流動車，如果可以翻新，環保署會透過慈善團體轉贈有需要嘅人士，如果溶溶爛爛醫番都嘥藥費，環保署就會送去指定回收商拆件，盡量減少污染。
呢個回收計劃聽落都唔錯，可惜吖，特區政府一貫辦事作風就係有姿勢冇實際。最大嘅問題係，全港就只得一部流動車咁大把，千里走單騎巡迴十八區，而且淨係星期六同星期日出動。傻嘅都睇得出啦，你有幸見到呢部車嘅機會率同買六合彩差不多，直情罕見過中華白海豚，仲難過巧遇你嘅夢中情人含羞答答講一句「咁啱嘅」。好彩嘅，你半年見到一次；唔好彩嘅，你成世緣慳一面。
環保有心人可唔可以主動跟蹤呢部神出鬼沒流動車？當然可以啦，事實上，本報記者就試過嘞，結果跟到去觀塘一處偏僻地點。原來呢架肩負回收電子廢料重任嘅流動車好盞鬼㗎，人流多嘅地方係唔會去嘅，淨係識得隱身於球場一角，本報記者親眼目擊，半粒鐘未見過一個人影，車上空寥寥乜都冇。計功夫茶話齋，不如改名「忍者車回收計劃」仲貼切，咁好彩遇見呢架車嘅人，簡直可以當正自己發現尼斯湖水怪。
自從舊年推出以來，流動車至今只係回收咗一千四百幾件電子廢料。咁你又知唔知全港一年所產生嘅電子廢料有幾多呢？答案係一百二十萬件。換言之，回收率係百分之零點一！
查實，歐洲先進國家係點做嘅呢？人哋老早立例規定，電子產品製造商要負責回收以及處理廢棄嘅產品。香港咯喎，○五年提出過類似概念嘅《都市固體廢物管理政策大綱》，之但係，事隔幾年仍然原地踏步，最快要等到今年年底先至「諮詢」，亦即係查撐篤撐亂噴口水，距離正式立法遙遙無期。
講環保，特區政府真係好老土。為藍天打氣，愈打愈多廢氣；引入電動車，全無充電設施；回收舊電腦，有姿勢冇實際。你話吖，香港嘅環保官員係咪廢柴吖？與其話電子廢料禍港，不如話環保廢官殃民。電腦揼落垃圾桶就話唔環保啫，至於人頭豬腦咯喎，功夫茶認為問題不大。