本文重點
港協暨奧委會會長霍震霆部白色法拉利畀卓妮發現裝有雷達探測器，探測警方影快相位置，消息出街後，大家都好想知道小霍係咪經常開快車，先至有咁嘅裝置。小霍尋晚出席ＬＶ（Louis Vuitton）時裝展開幕禮後頻頻呼冤，話好耐都無開過部法拉利，更加唔知邊個喺部車裝咗雷達探測器，只因為當日司機要去接載貴賓，佢才自行開車往返立法會。
唔知邊個裝探測器
小霍尋日鄭重澄清，今時今日已唔再開快車：「呢部機究竟係邊個安裝我都唔知，後生嗰陣時就話開快車啫，但我已經一把年紀嘞，都唔會開快車喇；莫講話開快車，平時連開車都好少，通常會由司機接載出入。」咁係咪啟剛、啟山及啟人三兄弟是但一個安裝嘅呢？小霍就話唔清楚，要返屋企追查過先至知！