如果你兩年內扣滿十五分，依照法例你係必須停牌嘅，之不過咁，法例同時又規定，違例駕駛者必須收到法庭傳票，上庭應訊之後，先至會被取消駕駛資格。好嘞，假設你係一個識得走法律罅嘅蠱惑仔，你就會千方百計避免收到傳票，譬如提供虛假地址。即使避無可避真係接到傳票，一樣冇有怕，因為你仍然可以打死都唔上庭應訊，只要未經過法庭處理，運輸署吹你唔脹，官老爺掹你唔長，冇人有權釘你牌，你照舊可以亡命飛車。
換言之，只要你一日未上庭應訊，無論你被扣十五分定係十萬八千分，你仍然係一個有牌嘅合法駕駛者。
漏洞講完，係時候講吓運輸署點樣補鑊嘞。各位觀眾，補鑊辦法係……登登登櫈……運輸署向全港駕駛人士發信，要求如果更改地址必須於三日內通知政府，仲要提供三個月內有關地址嘅證明文件，否則可罰二千元！
唔知大家點睇，功夫茶就覺得呢個補鑊辦法唔止低能，而且擾民。喂，講過啦，如果你係存心走法律罅嘅蠱惑仔，你梗係千方百計避免收到傳票㗎啦，更改地址點會傻傻更更話畀政府知？所以話啫，呢個補鑊辦法係廢嘅。
好嘞，邊個會老老實實通知政府自己搬咗屋呢？當然就係奉公守法嘅良好市民，問題係，三日時間咁少，點提供有關地址嘅證明文件呀？電費單又未必有，水費單又未必有，信用卡兇神惡煞追數都未必咁有效率啦，提供條毛咩！
換言之，呢個補鑊辦法對於扣滿分之後繼續橫衝直撞嘅壞蛋係冇用嘅，淨係可以懲罰好人，所有老老實實但係交唔出地址證明嘅好人。好人好姐唔想無辜辜受罰，點算呢？唔好搬屋囉，一世都唔搬，冧樓都唔搬！
唉，查實運輸署之前已經度過一條絕世屎橋補鑊㗎喇，不過一樣低低能能。運輸署向立法會提交修訂條例草案，日後會先以普通郵遞方式將法庭傳票送交司機，假如司機冇依照指示出庭應訊，傳票就會以掛號郵遞方式再送交司機，即使傳票無法派遞，一律當作已送達論。至於最關鍵嘅問題，司機硬係唔去法庭應訊又點呢？修訂條例講明：裁判官不得在當事人缺席聆訊的情況下，作出取消其駕駛資格的命令。
講到尾，運輸署由始至終都冇辦法釘死存心逃避停牌嘅蠱惑仔。咁就唔該申訴專員公署出手嘞，公署唔係講過會主動調查運輸署執行扣分制嘅漏洞咩？計功夫茶話齋，順便查一查署長黃志光嘅智商，要求佢三日之內提供智力測試嘅證明文件，否則罰款二千！