工聯會早前領導層換屆，選咗個只有三十九歲嘅吳秋北做理事長。由於工聯會今次大膽起用年輕人，外界知道佢最多嘅係佢個花名，啲兄弟封咗佢做工聯會吳啟華，但佢好似有啲抗拒，仲話驚吳啟華唔鍾意。唔少人私底下都叫吳秋北做「吳揪得」，佢好坦白話自細都好瘦，從來都係全身冇一滴脂肪，所以吳揪得呢個花名畀人由細叫到大。
吳揪得尋日同傳媒茶敍，承認無論歷練、遠見、資歷同啲前輩冇得比，仲有好多嘢要跟啲前輩學嘅。不過佢不諱言，加入工聯會十年，愈踩愈深，要為勞工基層嘅公平發聲。工聯會通過成立政務委員會催谷會員參加區議會同立法會選舉，吳揪得話只要工聯會唔係為政治而政治，撈政治油水，而係為爭取勞工權益，佢係唔會抗拒政治。總之唸咗一堆政治台詞喇。
吳揪得未出去同人揪之前，首先要接手壯大工會，依家有卅二萬四千會員，今年要增至卅四萬，明年就去到卅五萬。較大嘅抱負係要搣甩會員專攞着數嘅壞風氣，但有乜具體辦法，佢尋日冇透露半點口風。