中小企在金融風暴下水深火熱，政府嘅中小企信貸保證計劃和千億元特別信貸保證計劃，過去半年已批出近九千宗申請，保證額涉及一百八十一億元，平均每宗信貸額涉及二百萬元，但作為進出口界立法會代表嘅「大象哥」黃定光竟然計錯每宗信貸額，仲當眾質詢政府官員，結果最後瘀爆收場。
立法會工商事務委員會尋日討論上述兩項信貸保證計劃，好多議員主力促請政府提高信貸保證額到貸款額嘅八成，令銀行批出貸款鬆手啲，等中小企有錢救急。不過，委員會副主席大象哥就「眾人皆醒我獨醉」，質疑政府批出每宗申請信貸額較少，指兩項計劃每宗保證額分別只得三十萬及十八萬元。
商務及經濟發展局常秘蔡瑩壁畀足面大象哥，沒有即時澄清條數，只在回應所有問題後重申，當局批出每宗信貸保證額高達一百九十萬至二百萬元。委員會主席方剛聽到個數目就質疑大象哥話：「係咪計錯數呀？計少咗個零喇？」大象哥於是面懵懵攞個計算機出來篤兩篤，然後恍然大悟話：「係喎！計少咗個零！」