本文重點
鄉議局位於沙田石門新大樓工程如火如荼，首階段辦公大樓現正火速興建，預計明年底前就會竣工，即係班鄉紳一年後就會由九龍塘搬入沙田開會。不過尋日鄉議局執委會有項臨時動議，建議改善現址嘅主席室、辦事處接待室、秘書處及廁所嘅環境衞生等，預計要二十萬元，為何臨搬前先至突然要搞裝修同衞生呢？
鄉議局總務及財務委員會主任鍾偉平話，好多高官出席鄉議局會議前，都會先到接待室或主席室等候，由於局內設施日漸陳舊，所以都有需要改善。不過，鄉議局仲有一年就搬新屋，單純為咗啲高官到場坐一坐而使咁大筆錢，值唔值真係見仁見智！講到搞衞生，請個清潔工人專責為辦公室和廁所消毒，想有菌都幾難。
盆菜宴有錢剩
鄉議局三月底慶祝主席劉皇發榮任行政會議成員嘅萬人盆菜宴，局方共收到二百三十幾萬款項，扣除開支後仲有近十六萬結餘，全數撥入鄉議局基金。當初曾傳出有個別鄉村村民因為經濟不景唔肯夾錢，但最後都眾志成城搞掂條數，而且有錢剩，證明淡定係有錢剩嘅！