本文重點
新立法會大樓嘅內部設計工作已經進入最後階段，秘書處尋日就喺舊大樓內，擺放咗將會用於新大樓嘅議員桌椅樣辦，畀班議員試坐同提供意見。新桌椅無論係顏色同外貌，都同啲議員依家用緊嘅有九成相似，但內裏其實就機關重重，有好多方便議員開會做嘢嘅新設計。有咗呢啲新設施，卓妮希望佢哋可以表現得有番啲水準，如果連人都襯唔起啲枱櫈就弊嘞。
首先講吓用嚟開立法會大會嘅會議廳桌椅，枱面明顯比依家嘅闊落，右手面放咗個多用途顯示屏，可以用嚟顯示議員嘅開會文件、投票紀錄、以至轉台
實喺其他會議室舉行緊嘅會議。其他新設施仲有一盞方便啲老花議員睇文件用嘅小枱燈，以及一支可以調校位置嘅收音咪，等啲議員唔使好似依家咁，成日夾唔好個咪而令其他人聽唔清楚佢講乜。
新桌椅喺議員嘅左右腳邊，各設有一個高度足以放入成支蒸餾水嘅儲物櫃，儲物空間畀依家大好多，咁以後啲議員就唔可以以唔夠位擺嘢做藉口，將啲香蕉同示威牌放晒喺枱面。新設計嘅投票控制台同冷氣出氣口，亦比依家嘅新穎同美觀好多，其中後者似足啲名貴房車嘅冷氣口，上下左右風速都有得調校。
冇交代價錢
秘書處亦準備咗將來放喺會議室Ａ嘅議員桌椅，以及供其他細會議室用嘅活動座椅畀議員揀，並附有每張櫈嘅詳細尺寸同功能，唯一冇交代嘅就係價錢，可能秘書處都知道班議員用公帑買嘢唔興格價喇。
卓妮