本文重點
香港總商會尋日換領導層，戲肉原本係自由黨前主席田北俊同全國政協常委陳永棋暗中較勁，互撐新人角逐理事會，點知場戲愈夜愈震撼！田少唔止支持嘅人落敗，黨友楊國琦更被突襲，失落總商會副主席位置，取而代之嘅，正係同田少有過過節嘅港鐵行政總裁周松崗，自由黨喺總商會內形勢告急。而棋哥就笑住口做解畫人，指尋日嘅選舉意義重大，反映總商會內嘅政黨勢力消退，一夜變天。總商會突然風雲色變，政壇勢將再起風雲。
總商會今年六人任滿，棋哥同馮永祥引退，田少、周松崗、盛智文、文路祝競逐連任，騰出兩個位引人打崩頭，棋哥支持親中色彩濃厚嘅裕華國貨余鵬春空降，再加新人、科技園主席蒲祿祺，田少則支持代表中小企背景嘅許惠敏同馬桂榕。兩陣對壘，勝負本兵家常事，但尋晚嘅投票結果，就令人大吃一驚，唔止許、馬出局，田少得票六百八十張，亦比周松崗、盛智文嘅九百張上下，相差一截，即係話，有人攞咗田少嘅票後無回禮，事態好唔尋常。
陳永棋叫田少引退
呢個時候，棋哥主動同記者分析大局，話總商會過去被政黨利益控制，好多人一直敢怒不敢言，仲用英文比喻話：「係狗擺尾，唔係條尾擺隻狗吖嘛」，所以尋日大家做嘢擺脫政黨支配，總商會以後由番商界主導。棋哥仲寸田少，應該係時候學佢由總商會理事會引退，又叫許惠敏兩個最好咪黐埋政黨度。講到呢度，棋哥好似有特異功能咁，竟然預言幾分鐘後，總商會新理事會互選正、副主席，自由黨楊國琦落馬。
果然，棋哥言猶在耳，田少就由會議廳行出嚟，無回應記者問題就離去，用表情印證咗棋哥嘅預言。據知，理事會上，突然有人提名港鐵行政總裁周松崗，取代楊國琦，總商會主席包立賢一度想做和事老，建議開多個位唔使爭，但隨即被眾人否決，即係呢鋪連包立賢都被人玩埋。
田少冷靜落嚟，夜晚對本報講，咁多年嚟，總商會一直咁威，係四大商會之首，某程度因為以前有自由黨立法會十票撐住，而自由黨做嘢就要吓吓顧住總商會嘅立場，蝕突畀總商會，經過尋晚一役，好嘞，自由黨以後唔再有總商會呢個包袱，可以輕身上路。棋哥玩預言，田少不甘示弱，預言總商會嘅社會影響力，肯定會愈嚟愈縮。