本港經濟已步入嚴冬，促就業、撐企業可以話完全失敗；首季貨物出口劇減百分之二十二點七，為近五十五年來最大跌幅，看來中小企於年底勢再掀倒閉潮；旅遊業受到金融海嘯與豬流感嘅雙重打擊，本月至今入境客量急跌七成，五萬名旅遊從業員或有一半飯碗不保。
事實都擺在眼前，鬍鬚曾去完美國回來，竟神志不清如染疑似流感的說「訪港旅遊業成為唯一亮點並維持穩定增長」，正當旅遊業喊晒救命時，你呢番說話係攞景定係贈興？預測經濟增長、估計收支盈虧，你經常估到離晒罩，如今憑實情看數據，你又未能判定是非，唔通你真係精於劍擊？聲東擊西，歪打正着，就咁叻過盲俠嘅聽聲劍而成一代宗師？
老朽讀王小波雜文，他說他年輕時讀蕭伯納的劇本《巴巴拉少校》，有一場戲給他留下了深刻的印象：工業巨頭安德謝夫老爺子，見到了多年不見的兒子史提芬，問他對做甚麼有興趣？這年輕人在科學、文藝、法律等一切方面一無所長，但他說自己有一項長處——會明辨是非。
史提芬的話把老爺子給惹火了，這明辨是非難倒了多少古今偉人哲者，你這小子明明無瓣掂，怎麼就能明辨是非？蕭伯納寓意明顯不過，年輕人常不知天高地厚，只掌握了一點皮毛的原則，就以為無所不知，對世界妄加判斷，結果整個世界都深受其害。
鬍鬚曾坐得財爺呢個位，對數字自然不能如老朽只知六合彩走勢，或對艷星的三圍數字感興趣。財爺的「明辨是非」能力不會如史提芬那小子的粗淺吧？王小波指出，任何受過一點科學訓練的人都知道，世上簡直找不到甚麼不言而喻的事，所以就有愚蠢。老朽也討厭愚蠢，皆因蠢係無藥醫嘅，佢令人一錯再錯，道歉完又道歉，好鬼無癮！只有反智的社會，傻才是一種力量，甚至是一種威懾！財爺唔傻，至少佢死都唔肯減人工！