政情：中國人有豬疫抗體？

李大董尋日現身馬場，講起身在美國讀書嘅公子有冇受豬流感影響，身為家庭醫學專科醫生嘅佢淡淡定回應話未驚過，佢咁講唔係得把聲，而係對中國人嘅體質別有見解。李大董話，中國人對豬病毒嘅免疫力應該幾強，皆因大家對食豬訓練有素，莫講話食豬肉，連豬腸、豬脷、豬腦都照單全收，早已對豬病毒產生抗體喎，真係信不信由你嘞。

同場仲有近日被傳係特首辦主任熱門人選嘅奧馬公司行政總裁林煥光，ＷＫ拖埋太太入場輕鬆睇跑馬，隻字不提政事，只肯透露奧馬工作仲有少少手尾跟，言下之意是否意味執埋手尾後就直奔禮賓府？大家不妨自己揣摩吓。