香港又再發現確診豬流感新個案，雖然港人對疫情不再提心吊膽，但病魔一日未除，都令人囉囉攣，馬會大董李國棟就別有見解，話中國人向來無豬不歡，連豬肝、豬肺、豬耳都吞埋落肚，食得豬多，同豬有關嘅病毒一早已經食晒落個肚度，區區一場豬流感，又使乜驚喎。
李大董尋日現身馬場，講起身在美國讀書嘅公子有冇受豬流感影響，身為家庭醫學專科醫生嘅佢淡淡定回應話未驚過，佢咁講唔係得把聲，而係對中國人嘅體質別有見解。李大董話，中國人對豬病毒嘅免疫力應該幾強，皆因大家對食豬訓練有素，莫講話食豬肉，連豬腸、豬脷、豬腦都照單全收，早已對豬病毒產生抗體喎，真係信不信由你嘞。
同場仲有近日被傳係特首辦主任熱門人選嘅奧馬公司行政總裁林煥光，ＷＫ拖埋太太入場輕鬆睇跑馬，隻字不提政事，只肯透露奧馬工作仲有少少手尾跟，言下之意是否意味執埋手尾後就直奔禮賓府？大家不妨自己揣摩吓。