香港公開大學尋日舉行二十周年校友日，身兼行政會議成員嘅公大校董會主席李業廣以主人家身份主持校友日嘅開幕儀式。李業廣做咗校董會主席成十年，仲有一個月就任期屆滿，可以功成身退卸下主席一職。
公大校長梁智仁尋日就對李業廣多年嘅貢獻如數家珍，特別對佢「揼心口」嘅能力更加係讚不絕口，「李主席真係一個籌款能手，○五年學校興建第二期校舍，我哋嗰時根本冇錢，最後全靠主席廣闊嘅人際網絡同個人魅力，先可以籌到巨款。」李業廣亦當仁不讓，直認當年籌款「一呼百應」。校長同主席合作無間，梁校長當然想李業廣繼續做落去啦，不過法例訂明校董會主席最多做兩屆，梁校長無奈話，「想留都留唔到，有啲失落」。
李業廣喺公大做咗咁多年，對呢間大學自然有一份特別深厚嘅感情，所以公大即使留唔住佢個人，都絕對可以留住佢個心。梁智仁可能都係咁諗，所以尋日都話同李業廣「緣分未盡」，仲預言日後一定會有好多合作機會添。