立法會上星期五起程去珠三角作四日三夜嘅經濟發展及環境事務考察，今日先返香港。今次嘅行程塞到滿一滿，每日有成六、七個活動。卓妮發現今次行程雖然趕，但幾位女議員衣着絕不馬虎，影相時喺一班唔係黑就係藍嘅男士當中特別起眼。
顏色鮮艷奪目
女議員嘅衣着各有特色，其中最端莊穩重嘅一定係Miriam劉健儀。Miriam呢三日嘅衣着都以套裝為主，顏色都係比較沉實嘅黑白灰，好切合Miriam內委會主席嘅身份，不過卓妮就覺得好似悶咗啲。另一位主席，財委會主席Emily劉慧卿就以鮮艷顏色搶晒鏡，外套唔係紅就係橙。前日夜遊珠江時，Emily仲換過另一套衫，條褲係白底紅碎花，感覺比早上參觀時休閒。至於邊個好睇啲，卓妮就覺得各有各嘅風格。
環境事務考察團主席余若薇嘅衣着非常有春天氣息，有兩日都係着唔同花款嘅碎花傘裙，卓妮發現Audrey特別鍾情綠色，每日嘅衫、裙、鞋中，總有一樣係綠色的，唔知同佢關心嘅環保議題有無關係？演而優則政嘅陳淑莊對打扮好有心思，黑白格仔雪紡上衣、粉紅色套裝應有盡有，Tanya話總共帶咗三對鞋上嚟，兩對係高踭鞋，雖然到處參觀自然要行唔少嘅路，Tanya話都一樣掂。
互相影相留念
今屆立法會唔少新議員都係第一次隨團考察，所以尋日同廣東省領導座談時特別雀躍，趁領導未到時，互相拍照留念。譚偉豪同謝偉俊互相幫大家影相，陳茂波、陳克勤同葉偉明隔着兩個位都照影。
議員們尋日其中一個主要行程，係參觀由已故全國政協副主席霍英東主催開發嘅南沙，其公子、議員霍震霆今次冇隨團，但係早就應承咗立法會主席喺南沙一盡地主之誼請同僚食飯，後來為免喧賓奪主，只好作罷。
卓妮