全球氣候暖化影響地球生物，連住喺北極嘅北極熊都不能幸免，去年到過北極考察嘅極地探險家李樂詩，更為咗北極熊嘅情況心痛。
「從極地看氣候異變」展覽尋日起喺香港科學館展出，李樂詩唔止幫手籌備展覽，仲慷慨借出佢去北極時用過嘅私伙嘢畀市民參觀，希望喚醒大家嘅環保意識，佢尋日出席開幕禮時有感而發話，依家氣候暖化，令到極地多咗開花植物，植物物種亦比以往多，但大家咪以為呢個係好事，正因為本應係冰天雪地嘅極地氣候變暖，所以先會令開花植物增加。
唔單止植物，李樂詩話佢喺北冰洋見到啲北極熊，行徑同以前都唔同咗，原來以前北極熊見到人類就會走開，保持一定距離，但今次北極熊見到李樂詩並無走開。不過，當佢有機會喺較近距離睇清北極熊後，李樂詩發現佢哋瘦咗好多，直情成個肚扁晒。
可以見到氣候暖化，連北極熊也消瘦，事關氣候暖化導致冰層融化，影響北極熊嘅覓食。