由新鴻基地產同政府合作興建嘅馬灣公園一期挪亞方舟，尋日安排傳媒參觀，新地副主席郭炳江及發展局局長林鄭月娥行足全程，睇勻成個公園，新地仲安排咗班參加EQ愛心大使計劃嘅小朋友喺度玩遊戲，班小朋友認真活潑可愛，氹到林鄭月娥同郭炳江不知幾高興。
話說娥姐同班小朋友傾偈時，問佢哋鍾意邊個展館、睇咗咩動物時，啲小朋友都答得有紋有路，點知一到影相時就開始蹦蹦跳無時停，有個靚仔認真鬼馬，影大合照時企喺娥姐前面，點知佢唔係乖乖地企定定影相，反而用手上嘅毛公仔遮住自己塊面，娥姐同佢玩埋一份，撥開佢對手。不過個靚仔繼續跳跳紮，扯住娥姐對手跳嚟跳去，玩埋「人肉韆鞦」，平時成個「鐵娘子」咁款嘅娥姐，對住個靚仔都無晒佢符，惟有笑笑口繼續影相。
企喺娥姐隔籬影大合照嘅郭炳江見到咁嘅情形，都忍唔住話︰「如果我個孫好似佢咁活潑就好囉！」之後仲舉起Ｖ字同大家影番張大合照，大家玩到笑呵呵。