患有癲癇症的陳先生獨居於富昌邨，去年十月往內地求醫，今年二月曾通知辦事處職員因病未能依時交租，但四月返港後發現單位已被收回，財物全失，「以前我未試過欠租，點知醫病會搞到冇咗間屋，房署只係執剩兩袋衫畀我，好多嘢都唔見晒，真係好慘！」
房署發言人指陳於去年十月欠繳租金且失去聯絡，鑑於政策規定累欠兩個月租金或連續三個月遲交租金已違反租約，警告無效後單位可被收回。如財物於規定期限內無人認領將被拍賣，物主如欲領回，可扣除費用後將餘款交還。
社區組織協會幹事彭鴻昌指欠租收回單位屬正常程序，惟當事人過去紀錄良好，房署應酌情處理，「有啲病人會住成半年醫院，房署係咪要考慮吓？如果要拍賣，都應該等耐啲，搵唔到（戶主）先至拍賣？」彭建議陳先生可循民事途徑追討損失。