呢個道理唔係功夫茶發明㗎。好似美國傳統基金會咁吖，佢哋一向好欣賞香港，所以幾乎年年都將香港評為「全球最自由經濟體系」，不過，美國傳統基金會硬係對香港嘅牌照審批制度睇唔過眼，認為發牌手續過分繁複會影響競爭力。
香港嘅發牌手續有幾繁複呢？巴閉咯，原來唔同地區會有唔同收費，而且非常難以置信，新界地區居然貴過市區！
話說有一位柳先生，原本喺深水埗經營小食店嘅，做咗二十幾年㗎嘞，舊年六月諗住去葵涌擴充業務啦，哈，一去申辦牌照就發現一個驚天大笑話。首先，深水埗嘅牌照費係一千八百一十元，葵涌竟然收費三千六百九十元，貴咗成倍。其次，柳先生走去問一問點解新界會貴過市區啦，負責發牌嘅食環署職員就話嘞，收費係沿用市政局以及區域市政局所訂定嘅水平。
大家記唔記得市政局以及區域市政局係乜東東？如果唔記得，冇問題，正路係應該唔記得嘅，因為市政局以及區域市政局一早冇咗，九年前已經由於「殺局」而銷聲匿迹，改組為現有嘅食環署。亦即係話，香港嘅官僚居然沿用死咗九年嘅舊制，完全冇與時並進。計功夫茶話齋，如果咁都得，香港法官不如用番大清律例咯，一見貪官污吏即判凌遲處死！
發牌制度居然會出現令人無所適從嘅「一牌兩費」，呢個古怪現象都係冰山一角咋。更加得人驚嘅問題係，慢過蝸牛嘅審批速度確確實實係會趕客嘅。
大家記唔記得香港幾乎年年都舉辦有好多機動遊戲玩嘅「環球嘉年華」？大家又記唔記得舊年忽然冇咗？原來係咁嘅，主辦單位舊年六月向政府申請，計劃聖誕期間喺舊啟德機場開檔，點知去到十一月尾，食環署仲未批出牌照，搞到主辦單位心急如焚，擔心計劃胎死腹中。好嘞，到咗十二月中，地政總署話喎，主辦單位放棄計劃，不過冇講原因。
因乜事唔再辦「環球嘉年華」呢？功夫茶唔敢講同金融海嘯完全無關，之不過咁，政府發牌太慢肯定係一個好主要嘅因素。試諗諗，十一月尾仲未發牌，距離聖誕只有一個月，何來時間籌備呀？官老爺！
所以話啫，發牌制度亂七八糟後果嚴重。如果唔想官僚作風窒礙經濟復甦，不如咁嘞，政務司司長唐英年捱下義氣，一邊跨部門管理全港樹木，一邊跨部門管理全港發牌，如果有時間剩，管埋全港鐵閘都仲得！