特區政府前日大鑼大鼓話要喺香港試行電動車，環境局局長邱騰華尋日第一時間變身「電車男」，親自揸住架電動車落立法會，個車牌「AM800」仲靚到爆，怪不得唔少議員出嚟睇車兼抽水曝光。不過啲議員睇完之後大潑冷水。
尋日中午十二點左右，卓妮咁啱行過立法會，見到最先蛇王出去立法會停車場睇車嘅議員係3L梁君彥同工聯會黃國健（ＫＫ），兩個圍住架新車氹氹轉，又猛問邱騰華架新車嘅詳情，ＫＫ擔心喺高速公路上轉線、爬頭唔夠力。邱騰華叫ＫＫ放心，事關佢親自揸過架車，其實同普通車無分別，叉足電又唔開冷氣嘅話，可以行到一百六十公里添。不過ＫＫ一聽到架車要成廿萬就即刻嫌貴唔買。
之後陳淑莊、李華明都蛇出來睇車，咁啱路過嘅財經事務及庫務局局長傻強陳家強，亦忍唔住坐上車感受吓，傻強乘機賣埋廣告，話架車有稅務優惠㗎。
陳淑莊同李華明夾手夾腳叫邱騰華帶佢哋兜番轉，佢哋由立法會出發，經紅棉路上政府總部後再返立法會。陳淑莊試坐後話架車的確係幾靜，但係就算架車無廢氣，叉電時電廠咪一樣有廢氣排出嚟喎，言下之意話架車唔夠環保。
無份坐新車嘅議員陳克勤，自爆做過二手車買賣。佢架電動車舊電池無替代零件，一定要用原廠貨，每舊電大概要成三萬蚊，都幾重皮㗎，所以佢覺得車價十二、三萬左右先至合理。睇怕邱騰華要加把勁再推銷至得啦！