中央為咗喺七一前營造和諧氣氛，早前高調批准立法會組團訪問珠三角，點知煲呔曾就揀喺同日自爆稍後會率領全體立法會議員訪問四川，擺明想搶立法會主席兼訪粵團團長嘅風頭。到前日四川地震一周年，煲呔曾又喺一項悼念活動上重提舊事，連咁嚴肅嘅儀式都想騎劫，認真唔識大體！
民主黨尋日煞有介事咁開記者會，話贊同議員訪蜀考察當地嘅重建進度，但就提出反建議，話應該由立法會自行組團，理由係立法會去年首次訪四川，亦係由當時嘅立法會主席范徐麗泰做團長，冇理由第二次去就無端端改由行政機關帶隊，暗寸煲呔曾為出風頭無所不用其極。
據聞港府短期內會再向立法會申請多約三十億元撥款，繼續支援四川重建，民主黨就要求中央先徹查地震揭露嘅「豆腐渣工程」問題，否則不排除會反對再加碼撥款。民主黨之前訪粵團安排要求多多，話就話反對綑綁，結果都係不了了之，但就搞到多名建制派議員被迫退團，尋日又多咗個前高官葉劉淑儀話要退團，擺明博曝光。今次民主黨又要節外生枝，同煲呔曾只係五十步笑百步，一樣幫唔落！