大學校長又要籌款、又要做好多行政工作，真係周身唔得閒，不過就算係咁，忙極都要抽時間出嚟曝吓光，等多啲人認識，好似城市大學校長郭位咁，尋日就專誠去咗保良局莊啟程預科書院嘅畢業典禮擔任主禮嘉賓，勉勵吓班中七畢業生之餘，仲可以順便宣傳埋城大，一舉兩得！
郭校長語重心長話，學生喺入大學選科嗰陣，千祈唔好淨係向錢看，因為錢唔可以畀到你最大嘅滿足感，學生一定要認清自己嘅興趣，自己有咩鍾意有咩唔鍾意，呢啲都唔可以逼出嚟，呢個關乎終身幸福嘅問題，一定要考慮清楚先得；佢話如果一心淨係想賺錢，選錯科入錯行，就真係會後悔莫及。
除咗興趣之外，郭校長又提醒學生唔好淨係揀啲自己接觸過嘅科目，即係要敢於嘗試，因為呢個世界瞬息萬變，唔可以一本通書睇到老，有好多嘢要邊學邊試，好似城大咁，有好多學科大家喺中學階段都未掂過，都應該去認識吓。其實莊啟程預科書院每年嘅入大學率都有成九成，對住呢班咁有潛質嘅學生，郭校長又點可以唔順便宣傳埋城大，隨時因為咁多咗一批優秀學生添！