本文重點
港府要發債，姿態似足小地痞，向立法會求其交幾頁文件，指吓鼻哥，就想過關，最終食咗閉門羹，被迫撤回發債決議案，要等立法會新成立嘅小組委員會過冷河，決議案先有機會重見天日。小組委員會今日開首次會議，港府早前徵召建制派勤王，抗衡泛民，點知結果十七個委員中，泛民只係得三丁友，有被傻強老點「入局」嘅建制派議員抱怨，傻強今次太過騰雞，錯判形勢矇查查，再一次印證傻強名不虛傳。
港府心急發債，本想快刀斬亂麻，喺五月二十日由立法會通過發行千億港元債券決議案，但傻強自己傻啫，竟然當立法會都係傻嘅，求其交幾頁文件，就要議員收貨，具體細節如官債息口同散戶獲配比例咁，全部交唔出答案，議員梗係睬佢都傻啦，表明唔賣帳，仲決定成立小組委員會，用放大鏡審吓呢個決議案，先至放行。
傻強早前頻頻揩嘢，雷曼事件被議員傳召照肺，強積金注款又搞到一鑊泡，亂派錢被人鬧，發債一役不容有失，加上泛民鬧得性起，兇神惡煞，傻強震過貓王，早前吹晒雞，猛拍建制派膊頭，拖馬入小組委員會築城牆，防範泛民玩嘢，點知又一次錯判形勢，淪為笑柄。
一個月後再提交決議案
小組委員會尋日公布委員名單，結果充滿戲劇性，傻強如臨大敵，嚴陣以待嘅泛民，竟然只係得三丁友報名，其他十四個委員，都係親建制或者獨立議員，簡直係反高潮。泛民早前喺傳媒鏡頭前狠批港府發債大計粗疏，又鬧決議案賦予「鬍鬚曾」曾俊華太大權力，總之一副大義凜然樣子，但到真正落手落腳入小組委員會做嘢，就全部縮沙，連影都無，呢種走精面現象，同傻強嗰份懵懂遲鈍，簡直相映成趣。
有建制派議員透露，傻強已經對小組委員會建制派委員落晒藥，打算欽點3L林健鋒做主席，開兩、三次會，搞掂所有議程，目標喺一個月後再次提交決議案畀大會表決。不過，世事難料，加上傻強手風一向麻麻，拎上手嘅項目都有手尾跟，發債決議案七月前能否鹹魚翻生，真係好難講。