一個確診豬流感旅客，幾乎玩殘灣仔維景酒店，連帶附近食肆都變得生人勿近，個多星期以來至少唔見十幾萬銀生意。酒店日前雖已獲解封，但市民陰霾未除，行近兩步都驚，3L成員尋日就拉隊幫襯「維景」隔籬嘅麵檔及沙爹店，花近兩千蚊催谷人流。
人流生意銳減
3L成員梁君彥（Andrew）、梁劉柔芬及林健鋒尋日中午出動醫肚，三人二話不說揀咗「維景」隔籬嘅「新潮興魚蛋粉」，坐低後叫咗魚鮫麵、牛雜河及炸魚皮大快朵頤，仲邊食邊聽吓麵檔陳姓太子爺訴苦。陳生大吐苦水，話「維景」被封期間人流銳減，估計麵檔每日唔見二萬蚊生意額，「維景」被封一星期，佢哋就冇咗十幾萬銀，咪話唔肉赤。聽見陳老闆咁慘，3L成員即時要求打包四十碗魚蛋粉，埋單計數使咗千幾蚊，由林健鋒負責找數。
食完麵後，3L成員仍未夠喉，再行去附近嘅「沙嗲城」「柯打」咗十幾盒沙爹雞翼及春卷，又再使多七百幾蚊，呢次由蘇菲梁自掏腰包埋單。老闆老先生見好耐冇大客光顧，拿拿臨走出嚟招呼。佢話自從「維景」事件後條街靜到飛起，難得有人雪中送炭，好感動喎。
打包慰勞傳媒
卓妮奇怪，3L買咁多外賣，莫非胃口真係咁大？原來啲外賣係送去立法會慰勞班傳媒朋友，3L怕大家見到「維景」一帶嘅美食有戒心，即興攞起雞翼及春卷大啖大啖咬，連手都唔記得洗就食嘢，畀卓妮笑佢哋唔衞生。Andrew就笑言啲雞翼好乾淨，唔洗手都冇問題喎。
維景事件雖然告一段落，話口未完，香港又有豬流感新個案，真係一波未平一波又起，Andrew話希望對抗豬流感疫苗盡快面世，咁就一天都光晒！
卓妮