不過功夫茶覺得語言應該係與時並進嘅，今時今日，知唔知撐飯蓋最叻嘅並唔係死雞，而係平機會主席鄧爾邦，所以建議改為「爾邦撐飯蓋」會傳神得多。
呢嗱，早前審計署報告炮轟平機會行政亂七八糟，又摷咗鄧爾邦任內種種不當行為，好似話喺○五年率領全體平機會委員以及九個高層訪京。佢就識歎呀，揀間大使套房，大花筒到冇朋友。佢尋日出席立法會政府帳目委員會聆訊，議員仲唔將佢落鑊煮熟佢！
以為鄧主席會腳仔軟咩？好難咯，佢兩隻腳伸得仲直過死雞，話間大使套房改錯名，冇真正「大使級」待遇。真係唔得佢死，不花白不花，不如下次再使多啲公帑，揀間總統套房，睇下有冇「總統級」待遇好唔好？
不過要數最膽大包天嘅係，鄧爾邦兩次喺完全冇諮詢委員嘅情況下，自行就報告內容回覆審計署，佢一味死撐話審計署以及政府發信要求將審計報告保密處理。
有議員當場踢爆呢封信唔係畀鄧爾邦一個人，而係畀平機會，即係主席同埋咁多個委員呀！鄧爾邦分明就係將呢份報告當咗係自己嘅事，當正平機會係佢自己嘅。有議員晒頭，唔係好明鄧主席嘅理解會同常人有咁大出入。
不過議員有所不知，鄧爾邦可能真係唔係好正常，事關正常畀人咁樣踢爆，應該認晒衰仔㗎啦。好一個鄧爾邦，愈撐愈勇，知道唔可以再用「保密原則」當擋箭牌，隨手賴落去審計署助理署長應國榮嗰度，話佢曾經表達過「平機會有保密問題」嘅訊息，先至將保密睇到咁緊。
唉，你話鄧爾邦叻又得，話佢蠢又得，成個審計署署長鄧國斌戙喺度，卸膊唔該卸遠啲吖。鄧國斌話審計署一貫嘅原則，就係要成個管治委員會都要知報告內容，消委會、旅發局都係咁做，佢亦曾經要求同事提醒平機會要諮詢委員。
真係人老精、鬼老靈，鄧爾邦完全冇半分示弱，話回覆審計署嘅內容全部都係實務性質，如果就住細項花時間逐一諮詢委員嘅話，可能會趕唔上審計署向立法會交報告嘅死線。
面對一個咁頑強、面皮又幾尺厚嘅對手，鄧國斌終於落足火力反擊話已畀足時間，如果要延遲提交日期，雙方係可以協商；佢仲話喺之前從未試過有被審計嘅機構，冇經過管理委員會嘅同意就回應報告，鄧主席都算係開創咗先河咯。
呢個鄧爾邦明明係詞窮理屈，都仲可以出力亂打還擊，有咁打不死嘅精神嘅人，真係舉世無雙呀。
計功夫茶話齋，鄧爾邦留喺平機會真係浪費咗佢，近排新加坡話要搞個環球影城，全球聘請演藝人才，反正鄧爾邦出年都冇得留低，不如去面試，表演一下獨門「爾邦撐飯蓋」絕技啦！