公共休憩空間問題引起社會關注，團體爭取政府開放公共空間予市民使用，不過，市區重建局主席張震遠尋日與傳媒茶敍時唱反調，更批評中西區區議會早前通過要一刀切全面開放區內嘅公共休憩空間，係十分「戇居」嘅決定。
事緣上環市建局總部地下嘅一間意大利餐廳，一直以政府短期租約方式租用對出部分公共休憩空間作露天茶座，但最近區議會以嗰度應開放畀公眾使用為由，拒絕再批出短期租約，換言之，嗰間餐廳嘅露天茶座不能繼續營運。張主席就話，佢雖然從未幫襯過嗰間露天茶座，但行過都認為嗰度好有特色，早上更有唔少晨運客喺度耍太極，取消咗好可惜，佢認為區議會應就個別個案個別處理，唔應該一刀切全面封殺。
不過，中西區區議員陳學鋒話，區議會都有難處，如果唔以統一標準嚟做的話，批一個唔批一個，好容易惹來閒話，一定有人質疑區議會處理不公。對於張震遠留意到被取消短期租約嗰間意大利餐廳，陳學鋒話區議會知道有異議，會再開會聽意見。真係左右做人難。