立法會訪問珠三角團今個星期五出發，五位隨團出發嘅無證議員，尋日急急腳去中旅社申請番張回鄉證，不過就爆出唔少蝦碌。
何俊仁同李永達兩個大頭蝦，齊齊無帶證件相，所以要臨時影即影即有嘅快相。幾分鐘後，何俊仁執起自己張快相就忍唔住笑，原來佢話張相影到佢好似成碌葛咁。
大家笑完一輪，議員們執筆填申請表，就開始討論要填寫嘅內容，表格之中，有一項要申請人填寫主要親屬嘅資料。點知呢項資料竟然難倒李永達，事關佢唔知道雙親嘅出生日期，最弊係佢媽媽返咗鄉下，一時間問都問唔到。這邊廂李永達填唔到主要親屬資料，那邊廂劉慧卿就話佢將主要親屬資料一欄留白，事關佢現時係單身。
五個議員去攞證，每人都拎咗九百幾蚊出嚟辦快證，事關佢哋申請晒一次性同埋十年期限嘅回鄉證，不過攞唔攞到就要十五號先知嘞。最可能發生嘅情況係，佢哋只需畀三百二十蚊攞一次過嘅快證，其餘攞十年證嘅近六百蚊會退回，星期五佢哋跟團去珠三角，證件全程唔會過佢哋手。