喺天文台做咗三十年，終於有機會坐正嘅新任天文台台長李本瀅，尋日正式以台長身份同記者見面。佢話上任後嘅第一項挑戰，就係迎接即將來臨嘅風季同雨季。所謂前車可鑑，前任天文台台長黑英林超英去年曾經因為「清晨」同「凌晨」嘅意思而引起爭拗，李本瀅打定開口牌話會平衡民意同科學。
舊年八月「鸚鵡」襲港、正值九號風球期間，天文台曾經揚言第二日「清晨」先至考慮降波，點知凌晨零時四十分就改發八號風球。卒之黑英走出嚟扮中文專家，同大家說文解字，話清晨係指凌晨後嘅一、兩點，認為天文台無搞錯，結果咪又係不敵民意要承認兩者有分別。
前任台長經一事、身為繼任人嘅李本瀅就長一智，佢話最大嘅挑戰就係點樣做清晰嘅決定，亦明白對於「凌晨」、「清晨」呢啲字眼，每個人嘅理解都唔係好相同，所以未來一年佢都會務求喺訊息發布上，一方面會聽取市民嘅意見，同時亦會依番科學數據嚟做好決定。難得李本瀅睇通天文台嘅工作不但係科學，隨時可以變得政治化嘅道理，不過做唔做得到，可能要過咗個風季至可以下定論。