今日係四川大地震一周年，唔少慈善團體同有心人，都無懼豬流感嘅威脅，親自返去內地視察災後重建工作，香港醫學會會長謝鴻興醫生就專誠喺上周六晚，跟隨慈善團體「站起來」，漏夜搭飛機返四川探訪。
原來謝醫生喺內地確診豬流感患者入住嘅四川省人民醫院演講，同協助災民嘅工作人員分享經驗，佢仲話自己當時矇查查乜都唔知，去到機場先知道呢間醫院收咗豬流感病人，搞到佢曾經虛驚一場，好在平時佢有做足防疫措施，包括勤洗手。雖然謝醫生話自己無經過醫院嘅病房，唔知院內戒備有幾嚴密，但目睹醫護人員都戴晒口罩，所以都好放心！
地震過咗一年，但唔少災區都未清理好，謝醫生形容災區場面非常震撼，地震嘅情景好似歷歷在目。一向率直敢言嘅佢，見到災民失去肢體、喪失至親後，仍樂觀面對生活，繼續「站起來」，都覺得好感動，仲勉勵港人要積極面對金融海嘯、豬流感等種種逆境。