本文重點
新加坡環球影城興建得如火如荼，更來港招兵買馬，香港嘅主題公園地位是否保得住，有待分曉。但環球影城個「朵」喺名人圈中頗有吸引力，前商務及經濟發展局局長馬時亨以及教育局局長孫明揚都話曾經幫襯過。
肥亨尋日中午現身香港會食飯，講起去大型遊樂場狂歡，佢話十幾年前曾去美國環球影城遊玩，至今講起依然好興奮。問佢覺得環球影城同迪士尼邊個好玩啲，肥亨唔知點秤好，忽然諗到一個比喻，話兩者好比川菜同粵菜，難分高下。
呢招轉移視線真高招，事關肥亨當年出任局長時，曾有份參與迪士尼同香港嘅合作計劃，係迪士尼親密戰友，佢當然唔方便數迪士尼嘅不是，之不過環球影城都係著名主題公園大阿哥，肥亨話年紀唔太細嘅年輕人去玩較適合，總之兩間主題公園各有千秋喇。不過對於鄰居新加坡起大型主題公園，肥亨都拍手讚好，話獅城係時候起多啲旅遊景點喎。
孫公未去過香港迪士尼
咁啱得咁橋，孫公亦係美國環球影城「粉絲」，不過已經係十幾年前嘅事，玩過乜就唔記得嘞。孫公似乎唔多好遊樂場玩意，即使香港有迪士尼，佢之前都未去過，但話口未完，話如果孫仔第日想去趁熱鬧，會樂於奉陪。
卓妮轉頭撞見立法會議員張文光，佢都曾經光顧過美國環球影城，最難忘係坐懸空雙腳嘅新式過山車，夠晒膽戰心驚。張文光話，一早睇好環球影城呢類主題公園，曾建議港府爭取喺香港起番一個，可惜最後冇晒下文，依家反而畀新加坡飲咗頭啖湯，真係唔抵。佢又話，新加坡增添新玩樂景點後，勢必同香港嘅主題公園爭一日之長短，最後鹿死誰手，真係要拗過手瓜至知。
卓妮