本文重點
兩岸分隔咗近六十年後，上年年尾正式實現通航、通郵同通商嘅全面大三通，大幅增加往返兩地嘅客貨運航班。唔少學者同立法會議員一早都講到明，大三通肯定會嚴重打擊本港嘅旅遊業、航空業同物流業，促請政府做番啲嘢。連中央最近都忍唔住要出手，透過CEPA六批准內地旅客去完台灣旅遊同瘋狂購物之後，可以順道過境香港玩多七日，畀香港旅遊業撈番多少冷飯菜汁。
不過反應慢半拍嘅高官，永遠都係當寶貴意見係耳邊風，一意孤行死撐話唔單止對香港冇影響，長遠仲有正面效益。之但係，被視為煲呔曾智囊嘅智經研究中心尋日公布咗一項研究，直接用數字講出影響有幾大，都算剝咗班政府高官棚牙。
智經研究中心喺上年十二月到上個月，用問卷訪問咗二千名港台兩地居民，又拜訪咗港、台、北京同珠三角嘅官員，仲有唔少學者同產業界等人士，進行《因應兩岸關係緩和．促進港台經貿關係發展》研究。
林D9猶稱百利無一害
研究報告估算，上年七月兩岸實現周末包機後，對港台航線嘅班次同載客量已形成一定衝擊，如果政府仲唔做番啲適當嘅安排，當全面開放直航後，將有三分二嘅港台客運航線受影響，香港亦將會失去港台之間原有嘅六成航空轉口貨運，同埋四成進出口貨運，而港台總航空貨運量將減少五成。
雖然份報告講到香港就嚟陸沉咁，但智經研究中心主席胡定旭尋日喺記者會上就強調，相信大三通只會為香港帶嚟短期影響，以削弱本港嘅窗口作用同中介人角色，只要港府肯聽佢哋建議，盡快推動港台旅客互免簽證、整合中港台航空市場、同台灣商討檢訂經濟合作框架協定等，香港應該仲有得救。可見肥胡其實都未必係有心踩政府同唱對台，可能係當頭棒喝，叫政府醒定啲都未定。
負責台港關係嘅政制及內地事務局局長林瑞麟，喺傍晚發表洋洋過千字嘅新聞稿回應智經報告，但內容依舊係毫無新意，繼續死撐大三通對香港有百利而無一害，港府已做足準備把握兩岸三通帶嚟嘅新機遇喎。奉勸肥胡下次都係揀過第二瓣嘢研究，或者索性慳番啖氣暖吓肚好過。