亦正因如此，母親節由美國人喺一百年前發起之後，迅速獲得世人嘅認同，依家已經成為普天同慶嘅大節日。今日係一年一度嘅母親節，又係為人子女向母親感謝養育之恩嘅大日子。
可惜吖，唔係所有人都可以喺母親節同媽媽講聲「媽媽真的愛你」。正所謂「樹欲靜而風不息，子欲養而親不在」，日前庇護工場鐵閘壓死好媽媽慘劇，死者嘅子女喺母親節前夕痛失偉大母親，情何以堪。「還番阿媽畀我哋！」死者子女對港府官僚嘅控訴，令聞者傷心，聽者流淚！
今次冧閘慘劇根本唔係意外，完全因為社署及建築署官員無心無肺，漠視危機，換鐵閘咁小事都要拖半年，先至搞出人命。慘劇過後，當局又係整色整水搞檢討、交報告，問題係，有邊次見佢哋會真正吸取到教訓吖？到頭來，咪例牌又係冇人要負責任。
更令人憤怒嘅係，社署唔止好卸膊，仲好涼薄，事發之後一直冇主動提供援助，甚至連正式道歉都冇句，簡直豈有此理！
母親節前失去母親，可以話係最大嘅人間悲劇，情同此心，心同此理。四川地震災區迎來劫後首個母親節，有人發起「義務媽媽」行動，希望可以為喺地震中失去母親嘅孤雛提供一絲溫暖。相比之下，特區政府唔單止至今冇同塌閘意外嘅死者家屬講半句道歉，同死者女兒商討殮葬時，仲好刻薄咁話殮葬費豐儉由人，發放款項限制多多，呢樣唔得嗰樣唔得。孟子話「惻隱之心，人皆有之」，因乜事成班高官會咁冇人性呢？
講到底，成班高官高高在上，不食人間煙火，只飲高檔紅酒，又點會知道民間疾苦吖？
其他嘅唔講吖，依家時勢咁艱難，對低收入家庭主婦來講，真係巧婦難為無米炊。呢嗱，有位好媽媽每個月靠些微綜援同患病嘅兒子相依為命，住喺冇電冇窗嘅垃圾房旁地庫，為咗慳錢，三十元煮足一日三餐，連六元石油氣運費都唔捨得，咁多年來自己托重達十七公斤嘅石油氣罐返屋企，托到頸椎都傷埋。
雖然六年來過着非人生活，但一講到個仔，好媽媽依然無怨無悔話：「生咗出嚟，就要揹呢個責任，有幾大風雨，都要照顧住佢。」
「世上只有媽媽好，有媽的孩子像個寶。」可惜吖，想班高官當小市民係寶就幾難咯！
財爺鬍鬚曾把口就話「福為民開」，但喺金融海嘯下淨係識得等運到，翹埋手唔做嘢，對協助低收入家庭乏善可陳。睇到喺逆境中掙扎求存嘅偉大母親，更加凸顯特區政府係幾咁涼薄！
計功夫茶話齋，今日母親節，為人子女要表達心意嘅話，最重要唔係一束康乃馨，亦唔係一餐好豐富嘅晚飯，只要明白不求回報嘅母愛係幾咁偉大，同媽媽真心講聲「母親節快樂」，更勝千言萬語。