一單確診豬流感個案，使一間三星級酒店先是高度戒備如收押重犯，繼而變成超級無敵迪士尼。解封之夜，封路逾六小時，附近商店食肆苦不堪言，而住客即將獲自由，興奮到大叫，又紅酒又擁抱，又嘻哈猛笑……你話啲人在迎新年又得，在開瘋狂派對又得，總之，一字記之曰：High!
老朽直情覺得灣仔維景酒店大堂門口要貼上春聯：
放一夜花爆，轟得新年，鬧鬧熱熱，大家想過好日子。
開兩扇大門，請進喜神，齊齊整整，小孩預備出風頭。
政府跨部門聯手防疫，可以話取得全面勝利。見微知著，今後政府只要發揮跨部門力量，沒有甚麼事做不了的。接載二百多個旅客，八時半酒店解封，要封路六小時，影響四十條巴士線，誇張過開世貿會議。老朽當日路過此間酒店，真後悔無入去歎杯咖啡，無緣見證這麼偉大的時刻，肯定係此生最大的憾事。
話時話，呢間酒店七日成名，被隔離完的住客，個個好似未來戰士咁，狂呼他日再遊香江，必定再入住：I will be back!最令老朽i晒頭嘅係，隔離七日後，員工溝通更融洽；最令人大惑不解的是，原本大吵大鬧的韓國商人，由要「告政府」到高唱韓文歌到極度亢奮尖叫「I'm happy!I love Hong Kong people!……」看官，呢間酒店直情係魔幻酒店，若鬍鬚曾於立會投票通過預算案前夕，請班議員住一晚，事前就毋須咁頭痕，搞到爭啲觸發憲政危機。老朽甚至相信，政府高官每周入住一晚，必定不會各自為政，肯定會發揮雷鋒精神：毫不利己，專門利人！
於是，鐵閘塌下殺人事件，就不會跨部門卸責，而係跨部門負責，個個爭孭鑊，人人爭認錯。
一間三星級酒店締造了香港傳奇，老朽建議將佢改建為六星級並易名「魔幻豪景」大酒店！