今屆立法會足球隊尋日首次大戰政府高官隊，不過政府隊落場嘅高官，最高只得商務及經濟發展局常秘栢志高，問責高官一個都冇落場，其他就來自唔同部門嘅公務員，負責主禮嘅政務司司長負責開波，公務員事務局局長俞宗怡同埋常秘黃灝玄亦只係坐埋一邊做觀眾，所以應該叫佢哋做政府「次等高官」隊貼切啲。
場波最後由立法會以二比一贏咗，但其實立會隊贏波全靠外援。尋日前後有十二位議員落場踢，一開始就由議員加上三、四個外援上陣，領隊譚偉豪、隊長林大輝、旅遊界謝偉俊同埋會計界陳茂波，不時都有助攻，加上外援嘅協助，立會隊上半場狀態非常神勇。
經一輪密集進攻，立會隊終於憑住外援成功撕破政府隊嘅防線，單刀射入第一球。不過呢一球似乎辣㷫咗政府隊班官員，事關立會隊入波靠外援，令政府隊心中有氣，一位政府隊球員仲因為同球證爭拗而被罰黃牌。換邊之後，曾經為救波撞到爆缸嘅專業會議劉秀成都落場守龍門，開波前劉秀成話咗會小心啲㗎啦，點知落場唔夠十分鐘，劉秀成又因為拉親隻腳，好快坐番埋位算數。
一輪拉鋸後，立會隊喺臨完場前約十五分鐘一次龍門前混戰，憑住譚偉豪一射入網。但譚偉豪話，其實入波過程混亂，大家睇唔到原來佢根本掂唔到個波，換言之又係外援射入，不過兩個入波都係由大輝助攻，總算為議員挽回少許面子。此時比數去到二比○，立會隊決定換走晒班外援，由全部議員上陣，點知一上陣就立即畀政府隊追番一球。所以呢次立會隊贏波，真係要多謝班外援啦！