趁住母親節來臨，香港婦女動力協會尋日搞咗個親親拉近分享會，探討家長與子女溝通問題，請咗民政事務局副局長許曉暉及教育局副局長陳維安做嘉賓。有兩個仔嘅陳維安話，父親在家中嘅角色，通常都係制訂政策，交由母親執行，所以子女眼中只有惡媽形象。許曉暉認為，長期由母親做衰人唔係咁好，應該平衡吓，父母輪流做吓衰人。
許曉暉又話，佢四歲大女見到同學有電腦玩，又扭計買電腦，但佢就覺得，小朋友成長過程中遲早都會接觸到電腦，毋須咁快買電腦畀個女，應該把握時間接觸多啲大自然。不過，有樣嘢卻難倒許曉暉，就係副局長工作量繁重，搞到佢唔識點樣分配時間去照顧兩個女兒，所以向在場母親請教時間管理問題。
有份回應嘅母親都係講番自己平時點樣分配時間，但個個家庭情況都唔同，係咪幫到許曉暉就唔知嘞，但當初入得政府呢個熱廚房就預咗工作忙，想唔忙咩，或者調去政制及內地事務局會好啲啩！