退休多年依然不甘寂寞嘅「陳老太」陳方安生，尋日又上電視台訪問發噏風。陳老太退休後「忽然民主」，人所皆知，但對於呢種評價，佢扮到滿不在乎咁話，某啲「閒人」講嘅嘢，唔會影響到佢做覺得應該做嘅事。其實陳老太依家早已冇任何公職在身，講嘢亦冇乜人有興趣知道，佢早前大鑼大鼓搞出嚟嘅民間策發會，煲極都煲唔起，嚴格嚟講佢先係閒人一個。不過學佢話齋，相信佢講嘅嘢亦唔會影響到任何人。
講到近年不時有行政會議成員公開批評政府施政，陳老太暗批佢哋食碗面反碗底，質疑呢個係乜嘢嘅集體負責制，但講到「一國兩制」同中港關係時，佢又話特首要敢於同中央據理力爭，表達不同意見，真係一時一樣、自相矛盾，聽多兩句都會思覺失調！