屯門黃金海岸鄉村俱樂部尋日起一連兩日搞咗個遊艇展2009，公開展出逾七十艘豪華遊艇，當中包括亞洲唯一一艘嘅「Predator 82」，身價高達三千五百萬港元，更有名人富商借出私伙豪華遊艇以供展覽，市民只要畀入場費，就可以入去飽覽一番。港協暨奧委會會長霍震霆尋日亦獲邀為主禮嘉賓，不過佢唔係單拖去，而係帶埋囝囝啟剛同啟山去見識，睇吓可唔可以喺廣東南沙發展遊艇。
霍英東家族九十年代初期開始喺南沙投資，霍震霆嘅爸爸霍英東喺晚年更將大部分心血投注喺南沙發展，身為霍英東集團副總裁嘅啟剛，依家亦將唔少時間放喺南沙。怪不得尋日見到小霍，問佢點解帶埋兩個仔去，佢笑笑口話：「南沙都可以發展遊艇，所以咪叫小朋友嚟睇吓囉。」
近期啟剛努力減肥，瘦咗又靚仔咗，問佢係咪為咗同跳水公主郭晶晶跳水而減肥，佢例牌否認，話純粹為咗健康；至於減咗幾多磅，佢就保持神秘唔肯講。講到啟山，佢一向好多緋聞，當年佢同喺國際打響名堂嘅內地影星章子怡拍拖，經常成為狗仔隊追訪嘅目標，尋日問佢有冇拖拍，佢竟然話冇喎，可能仲未有固定女友啩！